Exposición de fotografía transferida á madeira _ Madeira Zombi

Fai tres anos que Ruth Beltrán creou o seu proxecto Madeira Zombi.

Fotógrafa de profesión, decidiu darlle un xiro ao soporte sobre o que mostrar a súa obra. As pezas de madeira desbotadas polo mar pensou que eran un soporte que casaba moi ben coa súa fotografía. Así comezou a andaina de Madeira Zombi.

Ruth recupera estas vellas madeiras abandonadas e transfire manualmente sobre elas, a súa propia obra fotográfica. Deste xeito consigue dotalas dunha nova vida e convertelas en arte.

Para esta colección de obras, emprega anacos de madeira desbotada polo mar, cheos de historia, que tiveron unha vida útil vinculada aos nosos oficios e paisaxes e son unha homenaxe á tradición mariñeira e ás historias de persoas e empresas que co seu esforzo vital fortaleceron o vínculo de Galicia co mar.

Entre as fotografías que podemos ver nesta exposición atopamos inmortalizados momentos do pasado, embarcacións, industrias, oficios ou momentos da propia vida da mariña.

Todas son obras de arte únicas e irrepetibles, xa que non hai dous anacos de madeira iguais.

 

Título da exposición: “Madeiras do Mar”
Técnica: transferencia manual de fotografías á madeira
Autora: Ruth Beltrán
Marca: Madeira Zombi
Lugar da exposición: Mercado galego da creatividade
Data: Do 14 –25 de marzo

 

Instagram: @maderazombi_ruthbeltran