⭐ Exposición · Ruxe Design ⭐
Xuño 2 @ 10:30 a.m. - Xuño 13 @ 8:30 p.m.
Do 2 ao 13 de xuño, o espazo expositivo do Mercado Galego da Creatividade énchese das cores, texturas e materiais que dan forma ao universo creativo de Ruxe Design.
Detrás desta marca está Jenny, artesá grovense e herdeira dunha tradición que leva xeracións transformando os tesouros que o mar deixa na costa. Daquelas colareiras que recollían conchas e as convertían en pequenas xoias nace unha forma de entender a artesanía baseada na observación, na curiosidade e no respecto polos materiais.
A súa obra é unha viaxe constante pola experimentación. Conchas, minerais, resinas ecolóxicas e cerámica conviven nun proceso creativo en permanente evolución, onde cada técnica abre a porta a novas posibilidades.
Nesta exposición poderás descubrir algunhas das súas coleccións máis representativas:
🐚 SUCA, inspirada na memoria familiar e nas conchas do mar.
✨ MARMA, pezas de resina mineral ecolóxica cheas de cor e personalidade.
💎 ALMA, creacións que poñen en valor a beleza dos minerais naturais.
🏺 TERRA, o resultado da súa paixón pola cerámica e o traballo co barro.
Unha mostra que fala de mar, de terra, de tradición e de innovación; de todo aquilo que fai de Ruxe Design un proxecto único.
Agardámoste no Mercado Galego da Creatividade para coñecer de preto o seu traballo.
🔶 Exposición aberta do 2 ao 13 de xuño
🔶 Mercado Galego da Creatividade · Santiago de Compostela
📝 Texto e cartel: @amoroteuestampaxeartesanal
