Unha idea orixinal de Laura González.
Que mellor fórmula hai para coñecer o traballo dunha artista que a de que sexa ela mesma a que nos fale sobre o seu proceso creativo?
Compartimos convosco un podcast que vai espertar a vosa alma imaxinativa, dende a voz dos seus protagonistas. Unha visión sobre as diferentes marcas que aniñan baixo o colectivo de Creativas Galegas dende o seu interior. En cada un dos capítulos que conforman esta paisaxe sonora coñeceremos e escoitaremos as persoas que se agochan tras estas marcas.
Neste capítulo presentamos a Mónica Rodríguez que nos falará do seu proxecto e nos mostrará a súa forma de expresar a súa arte.
A marca:
Pécora
Quen está detrás do proxecto:
Mónica Rodríguez Varela
Profesión:
Deseñadora téxtil, de estampados e complementos. Artesá.
Breves pinceladas da técnica empregada:
Traballo diferentes técnicas: acuarela, fotografa elaboración dixital de estampados, estampaxe botánica e manual, elaboración de patróns, corte e confección artesanal de pezas e distintos complementos.
Momento ou motivo de inicio do proxecto:
Nun momento de indecisión e baleiro vital sentía a imperiosa necesidade de crear algo tanxible coas miñas mans. Algo que me fixese sentir útil, válida e mantivéseme ocupada. Algo que me gustase ata o punto de parecerme belo e xerase no meu unha sensación de pracer estético. Algo que puidese ofrecer. E, non se porque motivo, un día calquera decidín facer unha boneca de trapo, sempre me gustaron e inquietado a partes iguais. Así que decidín crear bonecas articuladas. Comecei a vendelas e a realizar bonecas personalizadas por encargo e descubrín que me xeraba moito pracer, especialmente facerlles os vestidos, crear o look, así que decidín estudar Moda. Polo camiño fixen un certificado profesional de xestión e aprendín a coser con Selvita, a marabillosa modista da miña vila. Durante a carreira descubrín que me apaixonaba crear estampados. Nunha das materias había que facer un proxecto de marca e aí naceu o xerme de Pécora.
Que debe plasmar o traballo final:
Sensacións, emocións e calidade.
Unha película, un libro e unha canción de inspiración:
A verdade é que sempre me resultou imposible e pouco representativo amentar unha única película, libro ou canción; nin sequera un tipo de cinema de literatura ou música, porque son moi ecléctica e diversa. Atopo inspiración en case calquera obra de arte, especialmente na Natureza. Podo citar obras que me impactaron, pero non deixan de ser unha parte pouco ou nada representativa do total; El Séptimo Sello de Bergman, Driving with the Breaks On de Del Amitri e Los Gozos y las Sombras de Gonzalo Torrente Ballester.
Un consello para alguén que quere emprender no eido cultural galego:
Perseveranza e Loita.
O mellor consello recibido?
Se podes deixar de facelo é que non é para ti.
Por que formar parte de Creativas Galegas? Que pode aportar e que aporta?
A unión posibilita o que en solitario é inviable neste panorama, o apoio, as sinerxías, os contactos e a amizade xeran novas oportunidades e unha sensación de arroupe e acompañamento fundamental neste árido camiño.
